Mga drug surrenderer nakadawat ug pamasko ni Probinsyano

Rey C. Suravasquez

Surigao City – Gatusan sa mga drug surrenderer sa lungsod sa Placer, Surigao del Norte ang nakadawat ug pamaskong regalo gikan ni Probinsyano.

Niadtong Domingo, Disyembre 18, 2016, usa ka pinalahing kalihukan ang gimugna ni Police Chief Inspector Manolito D. Parazo, Placer PNP Chief, nga diin naghatag kini ug pinaskuhan ngadto sa tanang mga drug surrenderer sa maong lungsod.

Si Parazo naanggaan sa dagnay nga “Probinsyano” tungod matod pa sa pagkamaisogon niini nga mi-implementar sa gyera kontra druga ug pagpahapsay sa kalinaw sa maong lungsod.

Sa maong programa nga “Pamaskong Handog ni Probinsyano” nalipay ug dako ang mga nasampit nga surrenderer ug ang mga pamilya niini sa nadawat nga bugas ug mga sangkap sa lutoonon sa noche buena.

Sa mensahe ni Parazo, ang maong nga regalo gikan matod pa kini sa mga stakeholders nga kinasingkasing usab nga mitabang pinaagi sa pinaskuhan alang sa mga magbag-o na sa ilang kinabuhi. Niini emosyunal si Parazo nga matod pa niini bugtong iyang gitan-aw ang mamahimong kaayuhan lamang sa kinabuhi sa mga surrenderer ug hingpit na nga biyaan ang druga.

Dugang tipik sa iyang mensahe nanghinaot pa kini nga ang maong aktibidad mamahimo untana kining giya nga mopatigbabaw ang gugma ug maghatag sa panglantaw kung unsa ka bililhon ang kinabuhi ug dili matod pa kini sayangan nga magumon lamang sa iligal na druga.

Gitambungan ang maong programa ni Surigao del Norte Provincial Director Police Senior Superintendent Anthony Maghari, mga stakeholders, Brgy. Captains, ug opisyal sa maong lungsod.

Leave a Reply

Your email address will not be published. Required fields are marked *