Pagdagan sa 16 kilometros, police trainee patay
Surigao City – Wala na makaabot pa sa iyang gradwisyon ang nakatakdang mo gradwar nga police trainee sa iyang pagbansay sa Caraga PNP Regional Training Center, Brgy. Lipata, Surigao City, tungod sa pagkamatay niini.
Naila ang biktima nga si PO1 Junry Baguhian, membro sa Public Safety Field Training Program (PSFTP) Class 2015-02 ” Maragtas “, ug molupyo sa Tagoloan, Misamis Oriental.
Sa nasayran, sumala pa niadtong alas 2:30 sa hapon, Disyembre 07, 2016 ang kadumalahan sa Training Center nagpahigayon kini sa 16 kilometros nga evaluation run isip kabahin sa bulan sa ilang nga pagbansay. Apan alas 4:00 sa hapon sa dihang padool na sila sa Training Center sa ilang pagtapos na untana sa 16 kilometros nga dagan, kalit lamang nga nalup-og ang biktima hinungdan nga dali kini nga gidala sa Caraga Regional Hospital.
Alas 10:50 sa gabie sa maong adlaw gibalhin si Baguhian sa laing hospital ug gibiyahe kini paingon sa MJ Santos Hospital, Butuan City. Apan sa sayong buntag alas 3:00, Disyembre 08, 2016 gibawian na sa hinulamang kinabuhi ang biktima.
Namatay matod pa si Baguhian tungod sa nasinating Cardiogenic Shock, Status Epilepticus, Hypoglycaemia.
